咖啡弄 (已結業)

非常怕等位但又鍾意試新嘢嘅我，決定挑戰另一長龍食肆咖啡弄! 唔同一蘭開咗别館即刻易等位咗，咖啡弄尖沙咀開咗分店銅鑼灣仍然多人，十二點攞飛兩點幾先有位，仲要遲咗要由頭排過，又冇得訂位，雖然可以打電話問叫到幾多號但又唔係咁易打通，結果叫到咁上下已經要去等費時miss咗，喺又窄又焗嘅樓梯等大半個鐘仲要避開上落樓梯嘅人，真係唔係咁好享受。 不過入到去又係另一世界，環境輕鬆舒適，餐牌成份雜誌咁(茶木都係，Taiwan style?)，侍應禮貌兼打扮新潮，入到去成個人年輕晒，哈哈! 食物不俗，果茶果味夠香，甜度適中，舊檸檬冰夠諗頭。窩夫外脆內軟，質素比其他地方高。牛角包三文治夠香脆。最緊要係呢度食物份量一啲都唔細，真係小食都可以當正餐! 本來一切都很美好，不過諗起之前排隊嘅苦況，望住嗰壺其實慢慢邊飲邊傾偈或者上網真係起碼可以歎一兩個鐘嘅果茶但係又要我個半鐘交枱，又覺得呢度用饍其實都係等完一大輪然後食到趕頭趕命，所有營造出嚟嘅氣氛都係枉然，到頭來一啲都唔輕鬆…都係等排除情況有改善，先考慮再去咯…