岩鹽日本料理 (利舞臺廣場) (已結業)

餐廳環境格調高尚，實在好難相信喺呢度一個晚餐定食嘅價錢只係百零蚊，淨係食裝修都唔只呢個價啦。坐低嗌咗個海鮮釜飯定食，既然胖侶唔俾飲酒就嗌咗杯凍檸茶，初時諗住佢呢度咁嘅裝修個糖漿會分開上，所以落單嘅時候無特別嗌到少甜，點知杯茶嚟到嗰陣見到糖漿並無分開上已經有啲淆底，好彩個甜度係我至愛嘅甜度，自動被少甜了，讚。愛爾蘭石蠔，定食套餐只係加多98蚊就有六隻愛爾蘭生蠔，我梗係唔會執輸啦，用凍檸茶嚟食生蠔都可以話係第一次，無計啦，鬼叫胖侶永遠是對的咩，生蠔入口甘甜，蠔身爽脆，海水味較淡，因此同個凍檸茶都算夾到喎。海鮮釜飯定食，個定食套餐份量都幾豐富，除咗有基本嘅麵豉湯同埋漬物之外，仲有一個雜菜沙律同埋三件刺身，以一個晚餐定食嚟講168蚊認真超值，沙律菜同刺身都好新鮮，並無因為跟定食就俾啲下欄嘢你，而個釜飯就有帶子，海膽，蟹腳，鰻魚，三文魚，三文魚籽，青豆，秀珍菇同埋菠菜，上枱嘅時候店員仲細心提醒可以食咗個原味先，因為食材嘅鮮味已經滲哂落啲飯入面，如果真係唔夠味嘅先至落豉油，果然食材新鮮，令我每一啖飯都充滿著鮮味，一滴豉油都唔使落，正。