孖寶 (已結業)

我已經食過好多次，通常周未想平靚正剧個扒都會黎呢間，午飯時間要排隊先有位，好在等左唔係好耐就有位了。鋪面地方唔算好大，但座位好闊落，坐得舒服，我同朋友都主要黎食扒，所以各自點了兩個扒餐share。個餐跟湯同麵包，我地都點左羅宋湯，酸酸甜甜中帶微辣，好醒胃。然後，紐西蘭肉眼配黑椒汁黎到，扒面熱得有點焦香，我地要求七成熟，所以切開仲有肉汁滲出，切一塊牛扒配黑椒汁真係惹味非常，而且牛扒好嫩滑又厚，足足有七安士咁大塊，午飯價錢黎講可以話性價比高呢，而個人鍾意黑椒汁配飯。之後就係美國厚切穀飼豬肉眼配燒汁，個朋友跟意粉，豬扒唔好擔心要全熟所以會好鞋，事實係好多汁好嫩，厚切勁大塊，好有驚喜，值得一提，有時其他餐廳意粉只會白烚冇味，靠個汁吊味，呢間就用蒜蓉炒香加調味，好食又飽肚。飲品我今次不得不推薦花茶系列，平時飲花茶一杯都幾廿蚊，呢間跟餐就可以選花茶，好健康既選擇，我目測全場8成多都係選花茶，加上佢選擇多，真係吸引，我就點了玫瑰花花茶，一個透明杯裝住，食飽飲杯花茶，消滯又暖胃，真係好貼心。