鼎豐雞煲泰國菜 (已結業)

講起打邊爐，其實肥雞最鍾意係港式邊爐，因為湯底可以揀肥雞最愛嘅花膠雞煲，但係好多出面食嘅餐廳嘅花膠湯底都係味精湯底，好難搵到心頭好。但係今次畀肥雞搵到！就係位於太子嘅鼎豐雞煲泰國菜，話就話食泰國菜fusion嘢，但係佢嘅花膠雞煲湯底竟然係最正宗！同澳門最出名嘅魚翅譚記嘅花膠湯底味道相似率高達90%！佢嘅花膠湯底真係唔係講笑，舊舊花膠大到好似手掌咁大，仲要係唔係一早落定，上枱嗰陣連埋半隻雞落埋落去，所以啲花膠送入口嗰陣係非常之彈牙一啲都唔冧，奶白色嘅湯底配埋黃色嘅雞油，真係非常之補身。配上相等嘅安格斯牛小排同封門柳，用呢個咁正嘅湯底打邊爐，每塊牛肉嘅牛香味配埋花膠味，真係一啖啖嘅精華。肥雞就試咗佢嘅即炸紫菜芝士響鈴，唔係講笑，啲芝士多到可以拉出嚟 ，配埋紫菜嘅香味，呢個未到肥雞都係第一次食。咁既然嚟到泰國餐廳，肥雞就嗌咗個泰式軟殼蟹，香脆可口啖啖肉，其餘打邊爐料例如韭菜餃，午餐肉就冇乜特別。最正嘅係飯後甜品有泰式芒果糯米飯同埋椰汁糕，有別於一般嘅傳統火鍋舖頭，最衰肥雞食得飽得滯，但係佢都水準好高。呢餐肥雞食到捧住個肚走，真心對呢間泰式雞煲火鍋店有好高嘅評價。