鍋匠中日火鍋專門店 (已結業)

身為邊爐戰士，一個星期打一次邊爐都唔過份，今次去到旺角鍋匠，除咗有唔同火鍋套餐選擇之外，湯底選擇亦非常之多，我地想食好啲，就揀左較矜貴嘅花膠螺頭湯底。花膠湯底絕無取巧，有足足一磅嘅花膠，加上又有原隻竹絲雞同螺頭片，放落鍋內滾熱，再品嚐一啖湯，完全品嚐到濃濃雞湯味道，而花膠亦軟滑充滿骨膠原感，一人分享幾件都無問題!接著嘅海鮮拚盤，上枱時已經賣相吸引，有蟶子、躉片、蠔隻、鮑魚以及大蝦，非常豐富! 蟶子無任何雜質、加上肉身彈牙，係非常新鮮嘅食材; 而蠔隻係枱上已經聞到濃濃鮮味，經滾湯煮熟後，亦不失鮮味，而鮑魚更加係鮮味之最，肉身厚身，入口極具彈性，易於咀嚼，啖啖都係滿足鮮味!食完海鮮，當然係肉類時間，呢3款分別係極上牛肉、手切金錢展、豚肉，都係大家必點之選，極上牛肉唔需要多講，脂肪比例完美，食到嫩滑口感; 而手切金錢展非常考刀功，入口爽勁有口感，同樣充滿濃郁嘅牛肉香味!食完火鍋後，呢度都有任飲汽水以及雪糕甜品，夏天時候食返杯透心涼嘅雪米滋或雪糕都係個好選擇，而且味道選擇多，總有一杯啱你口味!