台灣麵

营业中

休息中

今日要去元朗覆診，去之前當然要醫飽個肚先啦，所以我就去咗呢間台灣麵。我係一個非常之眼闊肚窄嘅人，打開個餐牌見到樣嘢嘢都想試。而我好鍾意呢間台灣麵嘅其中一個原因就係佢有得雙拼。啱晒我呢啲樣樣都想試吓但又食唔多嘅人。我今次就揀咗紅燒牛肉麵拼炸髀新竹米粉。佢個炸雞髀真係好滑，個雞皮又炸到脆卜卜咁，又真係幾好食喎。而新竹米粉就會比普通米粉幼身啲，感覺好似比較索湯啲。而另一邊嘅紅燒牛肉麵都真係好正，佢啲牛肉真係又香又腍，仲要入晒味，超好食。小食我就買咗個炸墨魚丸，佢啲墨魚丸真係好爽口彈牙，入面仲有粒粒墨魚肉，最重要嘅係佢炸到啱啱好唔會乾爭爭。另外我仲嗌左個肉操油麥菜，佢係用滷水汁上，啲菜索晒啲汁好好味。啲飲品我就試咗佢個特飲，蜜桃玫瑰花釀，我估佢花樣嘅意思係唔同花嘅蜜糖，甜甜地嘅潤喉，再加埋啲彩色椰果都幾好食㗎。