南洋麵屋 (已結業)

天氣開始熱同潮濕，自然心思思想食東南亞菜。既然叫得南洋麵屋，必然會試試喇沙。麵食不論湯底、餸菜定麵條都有好多選擇。湯底冬陰同喇沙，怕辣嘅都可以揀清湯；麵方面集南洋各國大成，金邊粉、油麵、拉麵...至於我就揀咗豬扒喇沙摻摻。喇沙湯底微辣，咖喱粉同椰奶比例恰好。唔計主菜豬扒，喇沙嘅配料已經好豐富，有多塊彈牙魚片，吸滿湯汁嘅豆卜...加上大碗摻摻，份量、味道都令人滿足~尤其係豬扒炸得乾身，香茅味突出，而且份量十足!Menu上面冇套餐嘅選擇，但點主菜、小食都可以用半價加飲品。比起普通飲品，我就強烈建議大家叫特飲喇，因為原價已經比坊間便宜，半價之後真係幾抵飲。我點咗雪糕紅豆冰(有雪糕同冇雪糕同價！)。有別於茶記嘅紅豆冰，呢度係用椰汁沖嘅，所以飲落會比較清甜。紅豆壓成蓉，質地更加軟，所用嘅豆比較細粒，但味道都唔錯。配埋士多啤梨雪糕，半溶後形成三色漸層，賣相同味道都昇華。喺泰國飲過都知泰式奶茶偏甜，但呢度因為聽咗客人意見而調製出茶、奶味較濃嘅奶茶，更啱我哋口味~餐廳座位闊落，店員都幾NICE，作為啱啱開業嘅小店水準唔錯~