芝樂坊餐廳

呢度只有WALK IN，冇得訂檯，每次放工黎幾乎都要等最少一個鐘，雖然每一次都係咁，但我地真係好鍾意食，每一次都會等，登記左之後，佢會俾一個機仔你，當有位既時候佢就會響，咁大家就可以行住街等。Menu 一D都唔花巧，而且款式好多，食左幾次都有未試到的菜式和芝士蛋糕，芝士蛋糕款式比主菜更多，呢度不論主菜、小食同芝士蛋糕既份量都大。香脆蟹肉球 –因為我地只有兩個人，侍應就推薦我地試呢個小食，份量比較小，兩個人都唔怕食唔哂，外皮炸得好鬆脆，配上蟹肉，非常惹味。小餐館炸蝦意大利幼麵 – 意大利麵非常爽口，配上炸蝦，唔會覺得太膩。GODIVA 朱古力芝士蛋糕 – 一直都覺得GODIVA朱古力太甜，但呢個GODIVA朱古力芝士蛋糕唔算太甜，朱古力味好香濃，立刻對GODIVA改觀。