芝加哥串燒酒場 (太和中心)

同朋友搵地方飲嘢，真係有口福啦. 朋友介紹呢度有間酒吧，唔單止多嘢飲揀，仲有好正嘅串燒。果然冇辜負我期望。酒吧環境舒適，唔會話好迫，燈光適合慢慢傾偈。最開心竟然有青瓜味麒麟啤，上面仲有啤酒泡沙冰，啱啱行到熱熱地，一坐低就有呢杯嘢飲，即刻舒服晒。朋友叫嘅呢杯有子梳打，一啲都唔頹，唔單止好多有子物喺下面，上面仲有新鮮嘅沙田柚，佢話飲落口感好豐富。叫咗串燒，竟然係一大板咁上枱，好彩張枱夠大。食串燒當然唔少得茄子，非常大條，調味適中，蒜蓉味香濃，再加多啲蔥花喺上面，少少孜然味，味道豐富多汁。呢個日式叉燒就更加驚喜，燒得啱啱好唔會過分油，肥瘦適中均勻，調味恰當，微甜。雞扒就更意外驚喜，大大塊，脆皮肉嫩。另外仲有晚餐叫，由於想食少少粉面，於是叫咗呢個豚扒烏冬。開頭諗住豬扒應該都係簡單野，點知係厚切豬扒，仲係好認真咁慢火燒，加甜醬喺上面，肉質彈牙。份量亦唔細，食到我哋兩個都好飽。 全餐侍應有禮服務周到，值回票價。