食美軒 (已結業)

幫襯過“食美軒”幾次，都係飲茶，貪佢靜靜地。 今次去食晚飯，依然維持專業美味嘅高水平，而且坐得舒服，唔會有一般酒樓嘅嘈雜聲，輕談淺酌，舒心！蟹粉小籠包一籠一隻，夠份量之餘，蟹粉金黃豐足，食落鮮嫩多汁，極之好味！酥炸蟹皇蓋外皮炸得鬆脆香酥，內餡全部都係蟹肉，口感甚佳，抵贊。雪裡藏龍以蛋白炒蝦仁為主，炸蝦伴碟。 蛋白炒到非常香嫩，蝦仁大大隻晶瑩剔透，而炸蝦酥脆Q彈，可以連殼都食埋，食落口腔充滿鮮味。蟹粉豆苗上枱時香味撲鼻，豆苗好新鮮，煮功亦好，配上清香滿載嘅蟹粉，好食到不能停手！臘味煲仔飯用料豐富，有臘腸、潤腸、臘肉同油鴨，飯粒分明又有脆脆飯焦，加上各種唔同臘味嘅油脂，非常滋味！最後奉送薑茶芝麻湯丸，驅驅寒氣，正合心意。平日中午比較少人，星期五夜晚竟然爆場，一定要訂位呀。