華鳥居 (已結業)

想一家幾口食日本嘢，有人想食刺身，有人又唔食生嘢，同時間又想打邊爐，點算好？我覺得華鳥居都係一個好好嘅選擇，諗住試佢最出名嘅水坎喎，但原來佢啲刺身都幾新鮮㗎喎，選擇當然比其他專食刺身壽司嘅店舖少一啲啦，款式就會似居酒屋多啲，乜都有啲，例如茶漬飯有幾個選擇，我哋點明太子口味，覺得同平時食嘅茶漬飯有少少唔同，調教到係適合香港人口味，都係好食嘅。另外，佢嘅藕餅真係一讚，竟然係有少少似煎堆嘅口感，唔同色嘅芝麻炸到好靚，好有驚喜。我哋個餐包埋沙律，雖然係普通嘅芝麻醬沙律，但係都幾有誠意。至於串燒，我會推介蘋果豬肉串，呢個組合真係非常之有趣，比我之前食士多啤梨豬肉串更加配搭適合，至於個水坎喎，係幾清嘅，適合一啲清淡口味嘅人，啲雞都算幾嫰，而我更鍾意食個雞肉丸。仲有最後就係飲咗杯檸檬酒，意想不到嘅好飲，下次要試埋其他口味先得！