渝味曉宇重慶老火鍋 (QRE Plaza) (已結業)

天氣轉涼就好想打邊爐，朋友介紹呢間從重慶過來的渝味曉宇係食麻辣火鍋的必試之選，就今晚放工過黎食下。一坐低，職員就端上一碗冰粉，可以食咗先墊胃再食辣會好啲，入口滑溜，好清甜。我地叫咗鴛鴦鍋，特式香果鍋配普通辣湯，每位$38, 香果係用蘋果加雪梨肉，好清甜，普通辣湯原來已經辣度好足，牛油味濃厚，辣椒多，香味十足，鋪满花椒，香氣撲鼻，不過食一陣真係辣到满頭大汗，嗜辣者必試。紅糖糍粑，$68, 即制新鮮，外脆內軟，紅糖漿的味道好濃郁，好惹味，糯米的質感好軟熟，熱辣辣。稻田毛肚，$112,薄身爽脆，入口好有嚼勁，而且好吸湯底的精華，味道一流。鮮黃喉，即係豬或者牛的心臟大動脈血管，薄而滑身，煮熟咗好爽脆，新鮮鮮甜，同辣湯味道好夾。美國安格斯優質肥牛，$208,雪花脂肪分佈平均，顏色鮮艷，牛肉味香濃，嫩滑鮮甜。曉宇嫩牛肉，$81, 份量多，肉質軟稔，咬落有嚼勁，牛肉味都好香濃。曉宇苕粉，$51,係寬的QQ 薯粉，質感好彈牙，煮熟咗好通透，吸收湯汁，味道惹味。自製洛神花茶，$18/杯，冰凍可口，清甜美味，飲落酸酸甜甜。