千賀水產 (已結業)

放題食得多，可以有埋磯燒水產嘅放題買少見少，今次元朗依間千賀水產就可以一次過滿足鐘意食刺身同埋磯燒水產嘅你。先講價錢，我地下午2點到，$178 一位，需要加一，加一後$195 一位。食物、飲品、甜品選擇都好多。基本嘅刺身同壽司款式都有，我就唔逐一講解，概括而言，都好好新鮮。今次主要想講磯燒嘅食物，侍應好好，會幫你手燒，然後d蝦仲會幫你剪埋殼，好細心。每台都會送一盤基本嘅海鮮，有四條大蝦、兩個扇貝、兩隻蠔、一個蟹蓋同一個錫兜裝住嘅蜆。你都可以加錢追加鮑魚（$28隻）、聖子（$28隻）同珍寶蠔（$22隻）等等海鮮。今次我就無加到，因為選擇左免費嘅蔬菜，有翠肉瓜、小甜薯同粟米。磯燒食物因爲有侍應幫手燒，所以都無燒到燶哂，海鮮好鮮甜。然後我再叫左個蟹皇海膽粥，個粥要自己煲嫁，會有碗飯，配料同生蛋，將材料落哂落去後，煲15 分鐘，好玩又好食。最後，食到飽一飽緊係要食甜品啦，甜品櫃都好多精緻嘅小蛋糕，花多眼亂。然後又見到個凍櫃有好多款雪糕雪條，諗左一陣，我簡左個益力多味嘅雪糕球。千賀水產係一間款式多，服務又周到嘅放題，大家要去試嘅時候記得預約呀。