今日嚟到中環Tempura Jiro試佢哋嘅輕盈版10件午市omakase，推開木門瞬間已經俾佢個竹風格吸引，簡約和風空間令人即刻放鬆曬。
前菜醬油漬赤身一上枱就知無揀錯！鮪魚赤身用醬油輕漬過，保留咗魚肉本身嘅清甜，又帶出深層次嘅鮮味。跟住嘅虎蝦天婦羅絕對係驚喜之作，蝦肉爽彈得嚟外層薄脆如紙，咬落「咔嚓」聲清脆過風鈴，師傅嘅油溫控制功力深厚。
兩款蘑菇天婦羅更見心思，金菇炸成鳥巢狀脆片，舞茸菇則突出菌香，配埋清甜嘅柿子和綿密栗子，秋日風味瞬間爆發。特別要讚個流心雞蛋松露飯，戳破蛋黃一刻簡直係視覺享受，蛋漿混和松露片同日本米飯，每一啖都係幸福。
追加嘅北海道真蠔蠔味濃到化唔開，宮崎A5和牛柳心更係入口即化，油脂香氣喺口腔盤旋成分鐘！成個套餐層次分明，由淡到濃恰到好處，完全顛覆咗我對天婦羅油膩嘅印象。
中環打工族想慰勞下自己，呢個每位$480嘅輕盈體驗絕對值回票價，add on都唔好錯過，記得提早訂位啊！
