上海一品香菜館 (已結業)

竟然係佐敦搵到間咁舊式的上海菜館，宜家流行新派上海菜，好難先食到咁懷舊的。兩個人叫了二人餐，原本套餐有冬菇豆腐、糖醋排骨、上海粗炒及粟米羹，我唔要炒麵同粟米羹，換了擔擔麵同酸辣湯。酸辣湯一上枱時，聞到好濃烈的酸味，原來飲落唔算酸，不過幾夠辣，料又多，好好飲，好耐都未飲過咁正的酸辣湯。糖醋排骨味道唔夠酸，再酸D會更加好，幸好排骨(豬扒)冇雪味，比起寧波同鄉會好好多。冬菇豆腐就太多茨汁，不過豆腐都幾滑。擔擔麵湯底有花生味，不過唔夠濃，而麵身稍硬。另外奉送兩杯豆腐就非常難飲，飲唔出豆味，有種怪怪地味道。總體來講叫做不過不失啦，起碼位置係後街，都有唔少人o黎食。