Burgerman (欽州街) (已結業)

深水埗是我第二個「家」，係呢度工作近6年，最唔捨得係區內又平又好食嘅食店，劉森記、駿、泰泰國美食、飯意、三哥譚仔、麻辣川、雲南風味過橋小鍋米線、大華茶餐廳、西九food court等等，臨近離別試下呢間平時路過唔多有意欲入去嘅漢堡店。老實說，我個人唔太喜歡食漢堡包，老是覺得漢堡唔健康且價錢不菲，一個餐就百幾蚊，而且食過中伏嘅漢堡包，印象麻麻，直至食過中環Beef & Liberty後，對漢堡包無咁抗拒，而呢間Burgerman嘅價錢相對自由，可淨買包唔要餐，單價由五十幾至八十幾蚊不等，我同男友就叫了一個餐同一個包。首先上碟係和牛漢堡包餐，咬落漢堡即爆牛汁，食落有重重的牛味，略嫌調味重手了少少，個包就無咩特別，有烘過及食落少許脆身。厚切薯條即叫即炸，上碟都鬆脆，薯條夠實正，類似Burger King咁。其次係鵝肝漢堡包，又係一咬落去就好多汁爆出黎，不過唔係鵝肝汁，而係食油，明顯鵝肝煎完無處理好油份，結果就勁多油滴到盒上。味道方面，鵝肝味道好出位，漢堡因此較為失色，兩者配合起來味道唔錯。一比之下，呢個漢堡牛味無和牛咁濃。又一次食到飽足。。。。(油到呢。。。。)