換句話講，呢區嘅餐飲業競爭又再大咗🙈。新商場暫時仲未出租哂所有商舖，食肆更只得幾間。同事話食過「花火和食」唔錯，可以一試。
餐廳裝修簡約，不過乾淨企理😉。
作為和風食店嘅佢🎌，食物款式有便當、拉麵烏冬同滑蛋丼飯等，主食相對小食抵食。
我哋一人叫咗一份主食再加小食Share，食物份量正常，賣相亦唔錯👍。
B7. 美國特級牛肩胛蕃茄湯手打烏冬($82)，齋一碗麵價錢計唔算平，不過餸同湯底都算幾出色！🐮牛肩胛貌似肥牛，但脂肪冇咁多之餘，牛味仲非常濃郁，真係意料之外，而且牛肉有好多片。烏冬冇乜特別，但個🍅蕃茄湯就幾唔錯，食得出唔係用茄膏開，唔太酸或太甜，啱啱好，隨湯搭配嘅料仲有魚板、粟米、木耳、冬菇同海帶。
A4. 東京風炭燒雞扒便當($72)，🍱便當內容相當豐富，包括麵豉湯、雞扒、炸物、漬物同飯。個人認為便當性價比高過湯麵，但其實兩者都飽。
炭燒雞扒🐔切件上，有四件，份量唔算多，但勝在肉嫩同個醬汁好食，即係平日串燒雞嗰隻汁。炸物個樣似麥樂雞，但其實佢係炸薯肉餅嚟，本身無預便當有炸物，所以而家有感覺特別開心😚。
日本芝士魚餅($48/2件)，🍢魚餅個樣十足十年糕咁，因為四四方方，外層煎至金黃色。魚餅好好味，加上咬開真係爆芝流心㗎🧀。
名古屋雞翼($48/2隻)，🍗雞全翼炸得好香脆，醬汁並無整淋個皮，另外仲落咗芝麻，所以特別香。
午市有85折優惠，折完感覺合理，並且配送汽水。不過我哋想飲茶🍵，所以每人加咗$6要枝裝抹茶同烏龍茶。
總括嚟講，呢間和食店唔錯，唔好預期味道好食得好驚艷，但每樣食物均係即叫即整，熱辣辣送上，能夠做到呢點其實已經好好呢，更何況味道一啲都唔曳😋。餐廳唔駛收加一，但店員服務態度都OK哦～。
