禮 (天光道) (已結業)

土瓜灣係屬於一個比較舊式嘅小區，唔好商業化嘅高樓大廈，冇人來人往嘅商場，圍繞着嘅都係一啲特色懷舊嘅小店。冇諗過喺土瓜灣竟然有一間高質嘅日本餐廳。餐廳嘅裝修好別緻，一入到餐廳入邊就見到一個大大嘅月球掛咗喺天花板上邊，非常吸睛。深灰色嘅牆身配上棕色木枱，帶比人寧靜嘅感覺。午餐時段有特選嘅定食，價錢合理。刺身四品配腐皮烏冬定食已經包埋沙律、漬物、水果、蒸蛋、麵豉湯，非常豐富。今日嘅漬物係麵豉醬大蒜，開頭以為大蒜會有一陣辣味，但原來經過漬醃後，辣味就消失咗，反而就剩返大蒜爽口嘅口感。四品刺身分別係中拖羅、真子碟、深池同埋小鰤魚。刺身非常新鮮，每片都係厚切，口感一流。自己最鍾意就係小鰤魚刺身，肉質甜美、脂膏豐腴。月見鵝肝和牛月見既意思就係指加上蛋黃既料理！呢度既月見牛丼飯用左和牛，另外仲加上鵝肝，令一碗普通既牛丼即時升級。和牛口感嫩滑，鵝肝油膩飽滿。而呢度個牛丼既醬汁係非常濃郁！味道一流。最後每人仲有一客綠茶雪糕。非常完美。