先講下個餐牌(掛住食唔記得影), 有幾樣野都係平時係街少見既，好似西班牙乳豬，煙肉秋葵，花雕醉雞翼等
反正我地幾個就乜都試下，講下個牛脷先
本人其實係唔喜歡牛脷同wasabi既，朋友叫左都冇辦法唔share, 值得一讚既係牛脷有好香既蘋果木煙熏味，肉質好軟，入口即溶，wasabi味唔太重中和左燒烤既油膩感，好好食
最大路既牛肉超抵食，啲牛肉一粒粒好似牛扒咁，都只係14蚊一串，老闆仲透露佢係用巴西牛，唔係大陸牛，牛魔王人仕必食！
平時食雞翼不外乎，炸，煎，buffalo wing, 辣味雞翼，而花雕雞翼通常都係涷食，老闆將佢帶係串燒界，估唔到個味好夾仲好入味，鐘意食雞翼既推介
煙肉秋葵與新彊豬肚，我鐘意個豬肚，煮得夠腍，唔un。而秋葵煙肉就口感好有趣，一方面好有味一方面好漿，只有呢度先有。
我地仲點左豬頸肉(抱歉掛住食冇影相),泰式醬好入味，肉汁鎖住係肉入面，燒完出黎一d都唔乾，必試！
最後就係大啡菇，老闆似乎係全能廚師，自制左香草醬放係菇上面燒，隻菇好大隻，我地四人每人分左半隻已經好滿足，香草醬味唔搶過菇味，菇仲好多汁，十分滿足
總結：出餐速度十分快，食品每樣都有水準而且每樣都有各自既特色，可見老闆落左不少工夫。肚就得一個，遺憾冇辨法食到佢隻乳豬，下次有機會會試下，老板仲話遲下有燒海鮮，期待下次黎會有新野食
