荳子 (海壩街) (已結業)

我老婆係一個「綠茶愛好者」，即係人地所講果種「綠茶控」，今日仲係佢生日添，一於投其所好去食荳子的綠茶甜品。貴為荃灣區最多「舐舐脷」食肆實力自必有返咁上下，位處海灞街角落頭位。入到去燈光非常柔和舒適，老婆發板叫左「流心抹茶芝士撻」同埋「3D拿鐵」。乜咖啡都有3D? 原來係用泡泡拉個立體圖案出黎，真係好神奇好有心思呀，難怪每枱限叫一杯。女仕們睇見泡泡公仔自然心花怒放，要黎影下相呃呃Like簡直一流，不過泡沫始終係泡沫，要飲拿鐵就真係要㗳真D。黎到「流心抹茶芝士撻」，聽落個名「流流地」，食落卻非常有驚喜。賣相先聲奪人，成個冰震「份子料理」咁出曬煙，好迷幻啊！插枝小木匙落個撻度，破開撻面層鑲金薄膜，係深綠色的綠茶汁。試一啖，喉濃立即充斥濃濃的綠茶香。仲有暖暖的「古古力蛋糕」和凍凍的「綠茶雪糕」，雪糕邊有綠茶餅碎和大大粒甜思思的「相思紅豆」，雪糕頂仲插左條「焦糖脆脆」，「痴線架咩，口感實在太豐富，太震撼啦！」呢個甜品比到人莫大驚喜，有機會一定要再黎試埋其他款式。