孖沙茶餐廳 (已結業)

喺上環返工咁耐，已經聽咗孖沙茶餐廳好多次，特別係佢嘅「三眼仔」煎蛋飯，都冇試過。今日心血來潮，的起心肝向膽固醇挑戰！餐廳裏面所有乜乜乜煎蛋飯，全部都係default三隻煎蛋，如果唔講明，一律default係太陽蛋。最多人叫係叉燒煎蛋飯，碟飯嘅碟頭適中，飯量唔會過量（當然可以要求加底）。飯面鋪上一層厚薄適中嘅叉燒，面頭再鋪上三隻煎蛋，最後淋上當店秘製豉油！叉燒食落只係普通嘢，唔係頂級但又絕對唔差，肉質有咬口，切得厚薄適中。原本以為煎三蛋係三隻煎蛋煎埋一齊煎，點知我嗰碟原來係煎雙蛋旁邊再加一隻煎蛋。其實無所謂，最緊要係煎蛋嘅工夫！利害之處係煎蛋全部有脆邊；蛋白剛剛熟全部轉晒白色，唔會有透明蛋清喺度，非常嫩滑；蛋黃下半係溏心，上半仍然係蛋漿，真係世界級！最後灑上嘅，係類似瑞士汁味道，又好似煲仔飯豉油，非常深色濃郁，帶微甜唔太鹹，仲食到用八角等香料煮過。個人覺得，最佳嘅食法係：一羹飯上面鋪上一片叉燒，加埋一角煎蛋，一定要脆邊連蛋白連黃有蛋汁加埋豉油汁，一啖食晒，就係人間美味！