小南國 (已結業)

京川滬菜，喺香港一直都好有市場。喺港人瘋狂愛上麻辣刺激嘅川菜之前，濃油赤醬嘅滬菜曾幾何時都獨領風騷。今日嚟到沙田新城市廣場，餐廳一大籮，好耐未食過上海嘢，又想坐得舒服啲，就去咗上海小南國。喺廣場The Menu行到最盡頭嘅角落，就見到喇。最鍾意上海菜嗰啲小碟，今日叫咗金瓜絲海蜇皮同紹興花雕醉雞。金瓜喺街市見得多，食其實係第一次。原來佢好爽，清新可口。雖然海蜇得嗰兩三條好呃秤，但金瓜絲夠好味補番數。醉雞都唔錯，酒味香濃，但個雞略嫌老咗少少。小菜系列叫咗香酥鴨，配薄餅上。其係佢個皮比較似春卷皮，脆但唔係想象中嘅香酥。用熱辣辣嘅薄皮，夾住大葱、青瓜同辣椒條嚟食，可以幻想自己食緊片皮鴨。食上海嘢點少得包餃系列？叫咗個灌湯生煎包。一咬就有汁噴出嚟，真係要小心燙咀先得呀！生煎包嘅皮上層香軟，底下香脆，好味！係個肉就細粒咗啲。腦裡面突然浮起N年前，第一次食小楊生煎嘅畫面⋯唔知而家xiao yang係咪依然好味，定已經梗唔落？