串Grill 自助燒烤專門店 (譽發廣場) (已結業)

想燒嘢食又唔想郁手，嚟自動串燒店啱哂！呢到每枱都設有自動串燒機，只要將串燒放上去就會自動轉。由於不斷轉動，串燒受熱均勻，火喉容易掌握，一次過燒十串都冇問題！而且燒烤爐係用電發熱，唔係碳爐，相對上冇咩油煙，亦唔會整到成身燒烤味！除咗串燒任食，仲有自助飲品任飲，最後仲有每人一杯Häagen-Dazs做甜品！呢到用QR code落單，環保方便快捷。枱上有各款調味料，包括：味椒鹽、辣粉、孜然粉、海鹽、韓式梨醬，同泰式魚露。串燒肉高質，基本上簡單調味已經好正！串燒款式選擇多，有牛、豬、羊、雞、丸、腸、海鮮、蔬菜同甜品！重點推介M6和牛，肉質細嫩，肉味濃，食多幾串，回本話咁易！牛舌爽彈，唔韌。雞丸骨亦係必食串燒，食落脆卜卜，好過癮。厚切雞腎同樣有驚喜，非常爽口彈牙！各式丸腸都係比較特別，唔係普通貨色。甜品雞蛋仔，則係一口pancake，香甜鬆軟；棉花糖外脆內軟，用電爐火力平均，外表燒得脆脆金黃，內裡軟糯，最重要係唔會一不留神就燒到著火！最後有Häagen-Dazs雪糕做結尾，一人一杯，仲有不同口味揀添！