亞蘇爾 (新城市廣場) (已結業)

呢間餐聽都開咗一排，原本對澳門/葡國菜冇乜幻想，但係今日feel like 想食啲新野，於是就即管嚟會一會亞蘇爾。椰香葡國雞配蒜蓉包 $128味道不錯，啲雞好香，煮得嫩，不過未算係驚為天人。另外碟頭較細，如果個煲大多一個圈會開心一啲。Menu 稱蒜蓉包上有芝士粉，不過味道並唔突出，蒜蓉都唔特別香，麵包烘得略過咗火，冇燶嘅，但係如果烘少一分鐘，個脆硬度會更好。葡式香烤脆皮乳豬件配薯菜 $188食落有啲驚喜，估唔到個皮烤得咁脆，啲肉都可以keep到咁嫩滑，而且啲肉仲醃得好入味！果然係招牌菜！下次食都會想再encore 嘅。但係因為個乳豬係屬乾身(冇汁), 如果個配菜由炸薯塊改為薯蓉咁就會更好。焦糖葡撻 $14 (一件)可以當甜品食，不過我覺得冇咁嘅必要。味道不俗，唔算太油，不過皮比較硬，蛋亦比起澳門名牌葡撻較實。可以一試，當係過下口癮，但唔需要衝住葡撻而來。