再興燒臘飯店

营业中

休息中

星期六既Function完結之後，一個人落左灣仔買羽毛球拍，買完諗食咩既時候，忽然諗起再興呢間好耐無去過既燒臘店。踏入鋪頭，滑滑既地下，加上一把同好景四仔阿叔一樣咁經典既聲音同我講係咪一位，埋邊有位喎。一切一切都係咁麻甩feel，講真如果唔係佢d叉燒同油雞咁好食，我點都唔會入黎，最多買外賣返屋企。坐低唔使點諗，同阿叔落order一碟肥叉油雞撈粗。你地無睇錯，的確係撈粗麵！其實N年前同科拉食既時候已經俾佢話，邊有人去燒臘店食撈粗架？！哈哈，但再興真係又俾你可以咁揀喎，仲要同一碟飯係一樣價錢，對於一向唔”湊”米氣既我就岩晒啦！用佢地特製既燒味汁去撈麵真係好好味架！有人話再興既叉燒好乾好硬，以我既經驗係一定要叫肥叉，千其唔好叫瘦叉或者普通叉燒，因為果d真係瘦得好緊要．．．真係懷疑果隻豬係咪非洲返黎既．．．無啖好食所以瘦成咁，亦都好硬。叫肥叉就岩岩好啦，佢地既肥叉其實係一d都唔肥，只係有dd咁多既肥肉，比起其他燒臘店既半肥瘦叉甚至普通叉燒都要瘦，但就軟熟好多，仲有少少燶邊，好香口好正！至於油雞，就肉滑同埋好夠豉油既香味，唔止雞皮上有，連肉都好有味。好滿足既一餐都只係二十二蚊，真係好味又抵食！