肉餅哥小炒料理 (已結業)

荃灣肉餅哥。好多餐廳會用肉餅做招牌菜，但可以肉餅做出各式新款配撘就唔係間間得啦！朋友介紹嘅e間肉餅哥就令我好好奇，佢餐牌有新穎嘅野味鵝肝肉餅、原隻帆立貝黑松露肉餅、原隻鮑魚肉餅等等。傳統嘅有金沙蛋黃肉餅、風味土魷肉餅等等。入到餐廳見到好多街坊，好彩一早book左位！餐廳裝修傳統，用嘅係木櫈木檯，牆身貼左一啲黑白嘅荃灣舊街道相，仲有d餐牌。落單嘅時候店員有問到肉餅要蒸定煎，解釋我聽煎係香口啲，蒸就肉質滑啲。套餐配一罐汽水，仲有老火湯。肉餅可以揀配粥、飯同麵。老火湯用料等足，有豬骨、瓜、果皮同蜜棗。飲落係媽媽嘅味道🤤🤤唔係味精湯👋🏻👋🏻足三兩花膠肉餅 配出前一丁三大塊花膠鋪係肉餅上面，淋左個汁好吸引！花膠好大舊，而且稔身好滑口。肉餅真係店員咁講好嫩滑，肉餅半肥瘦仲有小小紅棗味。出前一丁係麻油味。蟹粉肉餅 配白飯成隻蟹嘅蟹粉鋪係肉餅上面，一上檯已經好香。肉餅煎過好味好香口，面層有小小燶燶地，夾埋d飯食就可以食2大碗飯。e個係用瓦煲上，食到一半下面嘅飯有小小燶燶地，好香口🤤🤤蟹粉太濃味，遮左肉餅本身嘅肉味。鐘意食蟹粉嘅人一定要叫啦！