僕之拉麵 (已結業)

肉愛食者拉麵🍜依款拉麵最吸睛嘅位係啲叉燒鋪滿成個拉麵碗，視覺上唔錯，3倍叉燒即係有6塊，餐牌話係用西班牙產嘅梅肉低溫烹調整嘅，另外好多粒角切叉燒，肉嘅份量的確可以令食肉獸啖啖肉咁食，而且叉燒有薄切有角切，口感上會帶有分別🥓湯底可以揀濃湯或者清湯，今次揀咗濃湯，餐牌寫係用咗西班牙豚骨熬咗12個鐘，溏心蛋嘅賣相幾對辦，配料仲有筍同埋蔥🥚拉麵之外叫咗一份小食炸章魚，數量比想像中多，係即刻炸嘅，章魚頗大粒又粗身，唔會炸到乾爭爭👌如果唔想食咁多肉嘅話，其實都有2塊叉燒嘅正常份量，以至係小拉麵同埋淨拉麵，係較少見嘅選項～