裕譽燒味專門店

营业中

休息中

夜咗收工，7點幾路經太子馬路轉角見到間燒味專門店仲有燒味賣，望入去都乾淨企理。入到去店員立即同我哋講乳豬同燒豬都已經售罄，可能係佢哋嘅名物，所以會主動告知。咁我同老公就點咗燒鵝三拼，跟一碗瀬粉同碗河粉。再點咗一碟燻蹄做小食。燒味就係有一樣好，點完轉個頭就有得食啦。三拼有油雞、叉燒同燒鵝，份量夠晒兩個人食，叉燒半肥瘦得來肥肉位仲係爽嘅，我鍾意。燒鵝唔止皮脆，肉味仲夠晒濃。燻蹄切得比較厚，個皮好爽脆。食完老闆仲好親切咁問滿唔滿意，佢話佢哋嘅燒鵝有用特別嘅汁料塗抹在燒鵝內，所以味道特別濃郁。下次早啲收工嘅話要過嚟食吓佢今日賣晒嘅乳豬！