壹號漁船

自從佢由稻香裝修變做壹號漁船之後，每個星期都會同屋企人去飲一兩次早茶，有時仲會夜晚去打邊爐，但係呢間嘢啲職員態度真係每況愈下。

今日見假期又去飲早茶，諗住打包啲嘢返去俾屋企人食，就放咗個食物盒喺枱面，落單嗰陣時職員見到個食物盒同我哋講特價嘢唔可以打包，大佬我有叫正價嘢㗎，你又知我一定係打包特價嘢？落完單等咗半個鐘，啲正價點心到晒，特價點心一件都冇到，問個職員佢先話唔記得落單，然後話已經過咗特價時段冇得落單。

真係呢間嘢飲咗咁耐茶都未試過「咁唔好彩」兩張特價點心紙都「唔記得落單」，最後晨早起身出嚟飲茶，坐喺度浪費半個鐘，一件特價點心都食唔到，仲要俾人聲大夾惡話已經過咗特價時段冇得落單，好似講到我問題咁。再係呢班職員做嘢真係改幾多次名都冇用，啲點心再平啲職員又唔肯落單，明明自己漏單又話過咗鐘數唔肯幫人落返焗住人哋要硬食正價點心。食到一肚氣真係以後都唔會再幫襯。