萬鎔少館 (已結業)

銅鑼灣智選假日酒店最近新開咗間中菜館，主打精緻新派中式私房菜，環境闊落且瑰麗堂皇，聚會宴客絶不失禮！🥢雀籠點心薈一共有6款點心，分別係翡翠蝦餃、鮑魚燒賣皇、懷舊芝麻卷、東瀛鰻魚酥、和牛天鵝酥及水晶菜苗餃。東瀛鰻魚酥幾特別，賣相似鰻魚壽司；和牛天鵝酥含和牛肉碎，牛香滿滿。🥢胡椒雞湯灌湯餃有蠟燭熱住燉盅，慢慢食都唔會變凍，夠哂細心；湯底雞味濃郁，胡椒則帶辣，惹味之餘，於冬天食十分暖胃。🥢菊花上素石榴球石榴球餡料有髮菜、粟米、甘荀、冬菇、木耳等，再伴以南瓜蓉汁，清甜又健康。🥢紅柿蒜子娃娃菜蕃茄去皮好貼心，娃娃菜及蕃茄吸收咗充滿蒜味湯汁，清甜又惹味，嗜蒜朋友必試！🥢豬手撈粗豬手炆得又腍又入味，骨膠原滿滿，另粗麵亦夠彈牙。🥢萬鎔班蘭糕口感似年糕煙靭，表面煎到金黃香脆，食落香口，另班蘭與椰香取得平衡，有驚喜！