茶餐廳2.0 (已結業)

昨夜平安夜，狂歡了一晚之後，一切歸於平淡。更可惜就係，公司實在太好生意，所以，今天要開工加班。不過，還好，可以返晏少少，歎埋個早餐先返去捱騾仔都唔遲。 早餐有A至F可以揀，價錢 $36或$38。其實，人生就係不外乎字母和數字，無論你有幾叻都好，幾個字母加幾個數字就可以代表晒你。 食早餐都唔例外，阿姐唔該一個B、一個C! 唔知搞咩鬼，等咗好耐都無嘢嚟。收尾問返阿姐，原來，餐廳個wifi死咗，搞到明明落咗單，啲單send唔到去廚房，到發現時，要再用手寫單，交俾廚房做餐。 好! 卒之有得食! B餐的火腿仿鮑片通粉好大碗，不過要盡快食，否則啲通粉會發脹同腍晒，就唔好食。 C餐個頂級午餐肉麵，令人失望，因為件午餐肉好似炸過咁，好怪囉! 另外，個湯底淡到好似滾水咁，淡而無味。 好彩煎蛋同埋香草牛油多宜都OK。 杯即磨咖啡都唔錯，幾香濃。單點要賣$20㗎。食個早餐配杯咖啡，只是$36，計落就好抵! 好! 食飽，出發!