老虎堂甜品專売 (奧海城二期)

营业中

休息中

奧海城老虎堂特別大間, 原來唔係淨係買珍珠奶茶, 有半間舖做咗糖水舖! 你冇聽錯, 係糖水舖。間舖其實好細, 得三張枱同埋一列吧檯, 其實隔離賣珍珠奶茶嘅地方唔需要咁大, 畀多啲位糖水舖, 客人咪可以坐得舒服啲囉!講番啲糖水, 主打綠豆湯同芋頭厚奶霜, 小弟就唔係好鍾意食綠豆, 店員又話招牌芋頭厚奶霜賣曬, 唯有叫咗個招牌芋圓同紫米厚奶霜紅豆湯。招牌芋圓賣相就一般啦, 我加咗兩粒芝麻湯圓, 叫做有啲睇頭。 個糖水底稀都不特止, 仲冇乜芋頭味, 啲芋圓都幾滑, 但有一兩粒個心煮唔透! 不過成碗嘢唔係好甜, 最啱就係嗰啲 又話要食甜品但又怕甜嗰啲黑人憎嘅人😅紫米厚奶霜紅豆湯都係好稀, 但用蒸氣打泡嘅鮮奶增加咗些少層次感, 紫米同紅豆都煮得好淋, 亦都唔係太甜。可能唔係咁多人, 食物都嚟得算快。 店員姐姐好勤力咁執枱, 值得一讚。 可惜店員喺廚房大大聲講粗口, 有少少大煞風景。雖然老虎堂話喺台灣甜湯係佢哋嘅知名品牌, 我哋食慣港式糖水, 真係唔太識欣賞台灣糖水! 最後提提大家, 佢哋啲糖水都好大碗, 細食嘅朋友最好兩人叫一碗。