老虎岩餐室 (已結業)

今日一支公去油麻地，簡單去左呢間老虎岩餐室食。老虎岩主打家傳滷水牛腩、潮式粉麵、同手工燒賣，之前試過呢度既牛腩，質素好好！餐牌有粉麵，唔同餐，淨食，小食，燒賣系列，飯，同飲品。可以掃QR code落單，都好方便。今日試試呢度既家傳潮式自選招牌湯粉麵，其實就好似車仔麵，自己可以按心水揀麵底同配料。呢度有3款湯底，我揀咗招牌牛骨湯底，唔洗加錢。湯底牛味香濃，浮面有油。主菜我揀咗新鮮牛腩，加$24，呢度用潮式滷水製法同選用本地鮮牛腩。可以揀崩沙腩，坑腩或者半肥瘦腩。我揀咗崩沙腩，貪佢入口柔軟彈牙有嚼勁，果然係有咬口，中間有筋，牛味濃。呢度出名牛腩，當然要多分原汁牛腩，加$15。原汁牛腩採用冰鮮安格斯半肥瘦牛腩，整得非常腍而牛味濃，真係好好食。麵底有粗幼麵米粉米線選，可以加錢要出前一丁，伊麵或者撈麵。我叫左郊外油菜底，一樣都係基本價錢$12。今日係生菜，好嫩。另外我都要咗菜心，加$10，菜心嫩綠，d菜吸咗個牛骨湯底好好食。葱同冬菜放係匙羹另上。每份牛腩有五六舊左右，食完呢碗牛腩真係大滿足。