新志記海鮮飯店 (已結業)

又係一間想嚟好耐但始終冇機會嚟嘅‘名店’！？今晚終於的起心肝...雖然得兩丁友，但都叫咗生炒排骨、生炒糯米飯、金銀蛋莧菜、豉汁帶子蒸豆腐。前菜有花生同辣豉油，花生偏咸，但幾脆。唔‘好’辣豉油，冇試到。生炒骨炸粉唔算厚，炸得幾鬆化。肉質有肥有瘦，好彩唔太油膩。啲汁唔會好稀，甜酸度適中。份量好多，差啲食唔晒！糯米飯同想像嘅差唔多，夠乾身、料超多。不過，盡量趁熱食，凍咗比較油。金銀蛋莧菜只係普通貨色，咸蛋直係好咸，味道一般，勝在夠份量。豉汁帶子蒸豆腐絕對係叫錯咗，豆腐雖然都幾滑，但完全冇味道，靠超咸嘅豉汁、豆豉頂住！帶子亦唔見得好食...最後加送糖水：蕃薯糖水。雖然非我所好，但都幾甜、薑味幾重。食到超飽，潤一潤都唔錯喎。原本對呢類老店服務冇期望，點知竟然遇上個新手牌，服務分當場加唔少，真係始料不及！總結：‘出名嘅’菜式總算名副其實，唔出名嘅總有佢嘅道理o羅！