香河越南餐廳 (已結業)

呢間就真係老字號，係銅鑼灣做左幾十年，不過今次都係我第一次入去食咋！佢地都與時並進，都設計左２人套餐，我地今晚就好趕咁叫左個２人餐，包括有２碗生牛肉河粉、一碟粉卷，一碟春卷同甜品！一落左ｏｒｄｅｒ就送上每人一碟青檸、薄荷葉同辣椒，最衰就係覺得自己熱氣，所以唔可以落太多辣椒（其實辣椒新鮮既味道係好香架！）粉卷好多地方都有得食，不過要調味調得好食既就好少有, 呢間比較淡口，唔係好吸引我～不過佢既炸春卷就做得幾好，反而鐘意多ｄ～本來一早預左去食龜苓膏，所以打算走架啦，老闆娘話有甜品，你知我都唔好架啦～咁見佢拎到出黎就打算食兩啖啦，最後我都食晒呀，因為佢原來係用糯米煲既糖水（無影相，因為趕住走），個糯米煲到好似白粥咁，不知幾綿，我係問老闆娘係咩先知原來係糯米，呢個先係全晚最吸引我既野食，好簡單，不過好正！