嬸母略為思索，並想到九龍城的創發。我只是略有聽說過名字，既然嬸母能在幾秒之間閃過這一家食肆，想必是有質量保證的老字號才對，沒想到見面不如聞名。即使付帳者非我，也要吞下一大肚氣。單純的無服務(無服務不等同服務差)，我會視乎食物質量來判斷是否值得再來；但如果要用如此搵笨、咁唔老實既手法做生意，我認為絕不可縱容，應該抵制。
食前我已上過開飯看看食評和推薦菜式，發覺這家店做生意手法似乎有問題。因為塞車所以遲到左，係電話入面已經提醒左嬸母叫佢問清楚價錢先點菜，以免比人漫天開價，心諗應該無事。點知道食到中途，個伙記走埋黎話：「岩岩你地叫個d例牌其實唔夠架，我見你地咁多人，所以幫你地改做例半(1.5份)。」當時一瞬間，全桌人沉默左一兩秒，然後開始表現不滿。我地點菜時，好明確係表達點例牌。就算有無講到，正常都係計例牌架啦。夠唔夠食係我地問題，我地鐘意每人食少少，叫多d餸唔得？如果你咁「關心」我地，你可以有禮貌地詢問同提供意見，而唔係等菜黎左，食左大半，先斯斯然走埋黎話要計例半價。我地已經食曬咁制，點知道你岩岩提供我地既究竟係例牌定例半？再講，從頭到尾佢都無問過我地意見，提都無提過，完全係自把自為改為例半，非顧客本身意願。
經此一餐，我又學到野。江湖險惡，永遠有你估唔到既招數。老實說，如果我賣單，我一定唔食呢隻死貓，一定抗爭到底，死都比返例牌價唔比例半價，理得我岩岩食既係例牌定例半份量，無問過我地，自把自為就係你地唔老實。如此惡劣的做生意手法，我真係第一次經歷。
至於食物質素，我承諾盡量不受我個人對此店的偏見影響，予以主觀又中肯的評價。全晚叫左11餸1湯，不過礙於只限上載八張照片，有些印象不深的就跳過。
1
胡椒豬肚湯 胡椒味非常重，算是頗對我口味
蒜子大鱔煲 鱔魚無咩印象，但蒜子非常好食，搶住食。
1
炸豆腐 內外熱度好夠，外層酥內裡軟。配汁無咩印象。
鹵水鵝片肉質偏鞋，但頗入味。
炸蠔餅 蠔仔份量少+小，但炸得幾好，不算膩。
炒蟶子 肉質鮮美又夠大隻，醬汁惹味！
炒魚麵 夠鑊氣而且魚麵非常彈牙，全晚我最愛的一道菜。
芋泥 芋頭味道好濃但非常油膩；另外還叫了反沙芋，硬得來又幾鬆化，夠粉。
老實講，我都承認味道係唔錯，但一來食時心情已經受到影響，而且價錢真係非常非常貴，覺得絕對可以比到更高質素或更多份量(換句話淨係唔抵食)。而且我絕對相信香港有其他更好食兼更抵食又唔會呃人客既潮州菜館！
我真係想知道，如果創發一直「堅持」其欺騙顧客的生意手法，到底「老字號」的招牌還可以保持幾耐唔比人砸爛？
