恆香老餅家 (已搬遷) 新店位置

星期六早上做乖乖女，陪父母去粉嶺打波，預咗會悶；於是就諗吓啲逗自己開心嘅嘢…有！係老婆餅！熱辣辣新鮮出爐嘅『恆香』老婆餅！較啱時間，即刻叫人車我去大馬路總店，一盒六件、連掃三盒。預埋男友、爺爺、嫲嫲、細叔、姑姐、細佬、娟姐、Emily、賓仔…諗吓踱吓…嘩！唔係好夠分，又買多兩盒。啲酥皮永遠又鬆又香，啲餡就永遠甜而不膩！未返番粉嶺已經食咗兩件！返到屋企，食完晚飯；先整熱個焗爐，跟住熄爐，打開度門，將啲特登雪凍咗嘅老婆餅放喺錫紙盆，擺入爐一陣〈但千祈唔好閂埋度門〉，等到啲老婆餅暖哂軟哂就食得！一件老婆餅，一杯Darjeeling，三代一齊，簡單、開心。