和記海鮮飯店 (已結業)

之前上網睇左呢一間海鮮飯店經濟實惠，早幾日約咗幾個朋友一齊去食飯，呢度由地鐵站行過嚟嘅話大約10分鐘左右，如果揸車嘅話附近有露天停車場或者有咪錶位。去到當日冇乜人，可能疫情嘅關係，但係抱住既來之則安之嘅心態，大家短暫忘記唔開心嘅事情。呢度可能地點上嘅不方便，或者老細抱住服務街坊街里嘅原因，餐牌上嘅價錢好似停留咗係五六年前左右，估唔到呢度仲有$60 一個小菜，講真係呢個價錢你喺街邊食都食唔到，何況仲係一個有冷氣嘆嘅地方，當然呢度衛生環境你唔好有期望，總之食完唔肚痛就算。聽聞呢度最出名嘅係燉湯我哋都叫咗一個，嗰個燉湯，清甜而不油膩，而且材料充足，未飲已經知道呢個湯係冇得頂，而且只係$80一客，分量足夠四個人享用小菜方面份量好充足，如果唔知嘅話我仲以為係加大的份量，對比喺出面嘅酒樓呢度足足多一倍。味道方面可能呢度上年紀嘅人比較多，廚師都會落重手調味，啱晒飲酒嘅人士。