Dates (已結業)

友人話想食西餐，本想係女人街其中一個 (要搭電梯，類似酒吧嗰間)，行過無上去，心血來潮想去Dates)，女朋友及友人話無所謂，就入去。因為七點幾，未係多人，大廚有時間出嚟話我哋知是日青口唔靚，改用蜆。女朋友及友人都唔算肚餓，所以由我點菜 - 兩個餐+一個小食。 白酒忌廉煮蜆 - (女朋友喜歡食蜆) 忌廉味夠重，蜆唔會老，好嫩口，個汁多咗少少，又稀咗少少。如果佢能夠免費配一碟切件的法包，俾顧客點汁食，咁就正(P.S.:此舖請咗暑假工，新手想快快手收碟 (當時明顯還有一隻)，我們stop咗佢，老細有禮貌地教佢唔收碟的原因，並解釋佢暑假工，提攜下一代，值得加分) 龍蝦燴意大利粉 (餐) - 龍蝦都有半邊，舊肉算夠食，夠嫩口，意粉嫌硬咗少少，今次汁就"傑"咗少少，龍蝦半得無咩汁上到去一齊食。 黑豚肉 (餐) - 件頭好大件，但中間唔"鞋"身，圍邊仲有D脆身，連條骨都脆脆地，唔錯。而女友對伴菜的薯仔有讚賞。坐咗兩個幾鐘，無人催埋單，加水速度適中，算上佳地方！