店內以淺木色做主調，配上紅白色燈籠，非常醒目搶眼。店面空間十足，座位都好闊落坐得舒服。
牛太嘅燒肉放題分左四個價錢，分別係$389/人、$469/人、$629/人同$899/人，我地就揀左第二平嘅日本產黑毛和牛燒肉放題套餐($469/人)，全部限時120分鐘，所有肉類、海鮮等等貴價野都可以經QR Code落單，其他野飲、沙律、小吃、甜品就可以喺自助區拎。
野飲選擇唔算太多，不過汽水、果茶、冷泡茶都有。
唔飲凍野都有多款茶包揀，不過因為新開張未有酒牌，所以就冇提供酒精飲品。
甜品雖然冇大牌子雪糕，不過就有雪糕機，都算有誠意。
每張枱上面都有簡單調味料，因為有唔少肉類本身都已經有調味，基本上都唔洗再加調味都夠。
一坐低例牌出去拎左野飲先，見有哩隻新出嘅有汽檸檬茶就試下，唔會似汽水咁多氣，比較似飲野梳打咁，配烤肉都唔錯。
溫泉蛋係原隻連蛋殼上，自己打喺碗入面，蛋白仲係半生熟狀態，蛋黃更加唔洗講。
雖然我揀嘅係第二平嘅黑毛和牛燒肉放題，但肉類質素已經非常唔錯，除左有好多款唔同部位嘅牛肉，好似封門柳、牛肋肉、板腱肉、腹胸扒，每款仲有唔同味道，例如燒汁、鹽或者和風京蔥，款式非常多。另外佢地亦有其他橫隔肉、牛脊肉、壺漬牛肋肉、牛舌、牛仔骨、牛腸......等等。
趕住食都唔會記得邊款肉打邊款肉，不過睇下啲雪花紋，堅係靚，而且上枱時全部都解凍得夠，唔會有硬繃繃嘅情況，哩啲肉全部都係可以任食，而唔係一次性架！
除左燒肉，佢地都有鹽燒大蝦、牛油燒帶子同鹽燒鮑魚，雖然海鮮唔算特別大隻，不過主角始終係燒肉，所以海鮮質素唔差已經Pass。
壺漬果味牛肋肉除左牛肋肉之外，佢仲有菠蘿同洋蔥喺入面。
食得多肉，食下牛蒡絲甜甜地清下腸胃都唔錯。
沙律菜都好新鮮爽脆。
雖然飽，但都會想試少少炸物小吃，薯條就腍左少少，炸雞粒同雞軟骨反而幾香脆。
抹茶蕨餅抹茶味都幾濃，煙煙韌韌幾好食。
軟雪糕有3.5牛乳同愛文芒兩款口味，亦可以揀紐紋，愛文芒個味幾出，所以如果食紐紋會遮左牛奶味，真係鍾意食牛乳建議分開食，餅筒都好鬆脆。
總結，烤肉質素好高冇令人失望，全部超靚雪花紋嘅黑毛和牛都可以任食，其他周邊野食款式就唔算太多，不過黎得主要係為食牛，所以都冇所謂，因為新張期間有9折，所以我叫嘅第二平嘅黑毛和牛放題埋單人頭都唔洗五舊水，以哩個質素性價比算高。
