蒲頭島 (已結業)

佐敦美食塔之蒲頭島餐廳本身有得揀打邊爐或者打邊爐加網燒，但我哋嗰日成10點半先去到，網燒賣晒，唯有下次先試。我哋揀咗C餐，$248頂級安格斯牛肉。湯底有10款俾你揀，想試人心白玉鍋，但由於我同我男朋友近排太熱氣都生飛滋，所以最後揀咗蟹肉冬瓜蓉鍋，清下熱氣去吓濕。除咗三張火鍋紙之外，各種菇菌蔬菜丸類，都可以出去大雪櫃到任你揀。出邊仲有幾款熱食，幾款糖水，大量甜品任你選擇，仲有雪糕機，旁邊仲有大量toppings任揀唔嬲。醬料方便都有10幾種，全部有冰粒坐着，感覺好新鮮。火鍋料質素一般，但安格斯牛肉值得一讚，雪花平均，入口滑脫脫，牛味夠濃。