達摩元祖麵屋 (已結業)

放完工同朋友約會行尖沙咀，之後就嚟咗呢間位於寶勒巷嘅日本拉麵店食嘢。呢一帶嘅餐廳選擇比較多，咁啱經過見到呢間，決定一試。拉麵店嘅環境幾寧靜，店員同我哋傾計交流，推介我哋各款拉麵同埋飲品，仲好熱情咁招呼我哋，真係幾難得。呢度嘅拉麵各有名堂，全部以乜乜達摩拉麵命名，其實係唔同味道嘅拉麵，餐牌上面都有寫。我揀左白河達摩，即係北海道牛乳湯拉麵，因為見牛乳湯拉麵比較罕有，較為特別。牛乳湯令到個拉麵特別滑身，食落香口。拉麵嘅份量ok，配有日本出產嘅雞蛋同埋紫菜，賣相唔錯。我嘅朋友點咗松川達摩（雞骨醬油湯拉麵）。我試咗少少，覺得雞骨同埋醬油呢個配搭幾特別，但個人口味都係喜歡北海道牛乳拉麵多啲。面質可以揀幼麵或者粗麵。叉燒有四款，可以揀豚肩叉燒、豚腩叉燒、豬軟骨，同埋豚角煮。至於蔥、荀同埋蒜蓉就可以選擇份量。食拉麵齋飲水真係唔夠爽，嗌埋杯冰涼嘅飲品就正啦。我地分別叫左青檸無花果梳打、青檸蘋果梳打。價錢方面，一碗拉麵加埋一杯嘢飲，大概一百蚊左右一個人，價錢合理。