小火焰韓式咖啡廳 (觀點中心) (已結業)

連續放3日端午節假緊係要放縱下，係隔離商場睇完戲出黎，朋友話想食韓國野，帶左我黎依間韓國茶餐廳。餐廳第一眼睇倒嘅係一整排嘅電視機，播放住最流行嘅kpop組合MV，成個氣氛好young好似番左韓國咁。我地叫左個三色前菜、香芒炸雞沙律、泡菜鰻魚燒拌飯。三色前菜好快就上左，三色分別係涼拌海帶、傳統泡菜同韓味甜蘿蔔。如果每種前菜都想試可以叫依個拼盤，都係D非常韓式嘅傳統涼菜 其中我最中意嘅係甜蘿蔔，酸酸甜甜咁好開胃。香芒炸雞沙律係想食健康d，又想食小小炸雞嘅人士可以選擇🤣炸雞都唔少，啖啖肉咁。上面嘅係甜辣咁嘅汁，非常香口。蔬菜方便非常新鮮，食落去仲係脆嘅，仲d切半嘅蕃茄。食沙律都可以食得好味！泡菜鰻魚燒拌飯睇相就知不得了，大半條鰻魚點樣會唔食？拌飯熱鍋上，裏面有粟米、泡菜、紫菜，每一啖都係料，令人上一啖接一啖！