Helfit Lifestyle Club (已結業)

夏天就到啦！係時候減下肥同陽光玩遊戲😂同事介紹呢度有間有營餐廳，餐單由營養師訂制而且仲有瑜珈課程可以參加，一於放工同男朋友黎試下。炮台山地鐵一出行5分鐘左右就到，非常方便！餐廳位於錦平中心三樓，一出電梯就係餐廳，環境好舒適，位置都好寬闊，同好姊妹傾密計都唔洗驚俾人聽到！😝我地一人叫左一個dinner set...頭盤有阿拉斯加蟹肉沙律🥗用左阿拉斯加蟹肉配合新鮮雜菜，阿拉斯加蟹啊肉質鮮甜，再配合埋沙律既醬又咸又甜，十分開胃！餐湯有鮮茄薄荷湯，超級濃郁嘅鮮番茄味，絕對唔係用罐頭湯去煮，淡淡湯都好似食緊蕃茄咁，好健康！另外仲配有芝麻包，芝麻包沾上醋和橄欖油既能提升香味，又能夠消滯！主菜我就叫左菠菜西班牙紅蝦意大利麵配龍蝦汁，裏面有冬菇片、雞髀菇條、筍、龍蝦肉、紅蝦等等既配料，意大利麵煮到岩岩好，唔會好硬又唔會好淋，配合龍蝦汁整個菜鮮味十足！最後仲有甜品同餐飲送，甜品係朱古力蛋糕🍰蛋糕有四層唔同嘅質感，香濃嘅朱古力味，食完朱古力蛋糕，食返少少水果感覺好fresh~餐廳嘅食物質素高，考慮緊同男朋友一齊報名學瑜伽，上完堂仲可以一齊落嚟食美味既健康餐。