六両三.台灣食堂 (已結業)

放假同屋企人嚟觀塘呢間餐廳食台灣菜。呢度係用QR code點餐，食物包括有牛肉麵、拌麵 、飯、涼菜、滷盤等等，款式都幾多。同屋企人都見到有一人火鍋，於是就決定試吓啦。火鍋共有三個湯底，包括蔬菜養生鍋、牛骨沙茶鍋同埋藥膳麻辣鍋，火鍋都包括左：蔬菜盤、肉盤、台式丸同飯或者麵一份。我哋分別叫咗蔬菜養生鍋套餐同牛骨沙茶鍋套餐。先講個湯底，蔬菜養生鍋望落清清地，但飲到蔬菜嘅鮮甜味，啱晒養生人士，而且能夠突顯食材嘅原味同鮮味。而牛骨沙茶鍋，一上枱已經聞到陣陣嘅沙茶香味，沙茶味道非常濃郁，甜鹹適中， 帶點花生香，啱晒鍾意重口味人士。而食材方面，肉類可以揀豬或者牛，我哋分別揀咗鹿兒島豚梅肉同埋澳洲M5肉眼蓋，鹿兒島豚梅肉肥瘦同厚薄適中，味道新鮮，食到豬肉嘅香味。而澳洲M5肉眼蓋色澤幾靚，牛味重，口感嫩。台灣丸共有三款，包括魚蛋、燕餃同埋鴨丸，魚蛋爽口彈牙，鮮嫩，海鮮味十足。燕餃既燕皮Q彈，鮮美。而鴨丸都係第一次食，口感實淨，重鴨油香，個人幾鍾意。蔬菜盤嘅蔬菜新鮮，而且洗得乾淨企理。麵食方面，我哋分別叫咗王子麵同埋台灣粗麵，王子麵索哂湯底精華，好入味。台灣粗麵有啲似烏冬，口感煙韌。