北京老家 (已結業)

和朋友聚會如果要食中菜，常常會想到北京老家，選擇多又好吃，而且最喜歡就是拔絲甜品，每一次都要食過先滿足！新年前同朋友食返餐豐富嘅，先點左個炸醬麵、鐵板牛肉、老醋蜇頭、小籠包。老醋蜇頭一上菜已被朋友們極速清哂咁滯，相都影唔切。青瓜清新爽脆，蜇頭更爽，係好好嘅開胃菜。小籠包唔係台灣果種咁薄皮，厚少少，但都有飽滿嘅肉汁。鐵板牛肉同炸醬麵味道可以，驚喜不大。不過炸醬麵麵質彈牙，有咬口，口感不錯。老家柚子魚，又係每次必食。魚皮炸得酥脆，魚肉唔會太乾或太油，淋上酸酸甜甜嘅柚子汁，同埋勁多柚子肉，越食越開胃！北京烤鴨，皮脆肉嫩，皮唔會太肥；薄餅皮薄，多食都唔會太飽。最期待嘅甜品，拔絲士多啤梨，一絲絲金黃色嘅拔絲，糖衣包住士多啤梨，外層脆脆地，咬落去士多啤梨肉質實淨，香甜，加上紅彤彤嘅外表，真係好吸引！再加多碗桂花丸子，清香又暖笠笠，大滿足！