緣屋 札幌元袓蝦湯拉麵 (信德中心)

营业中

休息中

事緣今日要過澳門玩，由於早咗去到信德中心又未食飯就周圍揾下有乜好食，見呢間拉麵店都大大間幾四正，人客又有唔少，估計味道應該都會唔錯，就入去試下。入到去先知呢間拉麵店來自北海道，仲曾經係橫濱拉麵比賽以蝦湯底得獎而一鳴驚人，小弟真係有眼不識泰山。知道餐廳由來後就立即拜讀Menu，見味噌蝦濃湯拉麵o既蝦味濃度係最高就點咗一碗，焦香醬油蝦濃湯拉麵o既圖片幾吸引又點咗一碗。另外，小食蝦多士同元祖蝦濃湯雲吞都唔錯，再點埋。兩碗拉麵一送上來已經有好香o既氣味，令人食指大動，蝦湯頭味道果真利害，完全有北海道o既風味，非常濃郁。而我更愛焦香醬油蝦濃湯拉麵，除了蝦味更有一股不能用言語形容o既焦香味好好飲。另外佢蝦多士都幾特別，好有茶餐廳o既風味，而且炸得薄身蝦膠又夠多，作為小食非常好。至於雲吞，完全吸收了蝦湯味，令蝦肉雲吞更鮮甜，係一個非常好的配搭。食咗咁多野都係2百幾蚊，呢餐真係非常滿足。