錦麗 (綠楊坊)

营业中

休息中

屋企附近新開咗間越南菜餐廳，平時收工時間見到都會排長龍，難得有得早放，就約埋好朋友一齊食晚飯。🥘我地叫左個胡椒椰子鮮雞鍋，揀左配河粉。雞鍋入面有紅蘿蔔🥕、嫩雞塊。雞湯加埋胡椒食完好暖身，而紅蘿蔔吸收哂雞湯底既精華，好鮮味👍🏼🍝我哋又叫咗軟殼蟹撈檬粉，軟殼蟹炸得金黃酥脆又大件多肉，仲有肉鬆、青瓜絲同花生碎，落埋越式檬汁，一啲都唔膩。我哋跟餐加錢叫咗兩件越式蒜蓉牛油雞翼。雞翼超大件，裹粉再炸過外皮好鬆脆，入面雞肉嫩滑，🥗我最鍾意牛油果米紙卷，入面好多生菜、牛油果都好新鮮，米紙就好軟糯，唔似出面超市買既好靭，點埋個檬汁好清新，正👍🏼🍹野飲朋友點左斑斕生薑茶，斑斕味清香，生薑暖胃，飲落帶甜；我就叫左香茅牛蒡椰子茶，牛蒡味同椰子味突出，仲有一條條嘅椰子肉，飲得又食得。價錢都大眾化，但野食真係有啲水準，唔怪得成日見到都排哂隊等位。