桃園制作粥麵餐廳 (啟田商場) (已結業)

今晚唔想煮飯，去咗藍田啓田商場嘅《桃園制作》嚟開餐。食肆面積頗大，座位闊落舒適。揀嘅係晚市自悠選，叫咗個胡椒豬肚雞煲，加馬拉盞通菜炒牛肉，另加多$20，配是日燉湯和藜麥飯。燉湯先上，蟲草花茶樹菇燉瘦肉，清清哋。馬拉盞通菜炒牛肉繼而上枱，份量相當足，通菜鮮嫩爽脆，牛肉都算嫩滑，惹味菜式，好好送飯。胡椒豬肚雞煲熱辣辣登場， 鹹菜、雞塊、豬肚、雲耳、腐竹、紅椒...材料十分豐富，仲加咗個蠟燭臺，慢慢滾住嚟食，可惜胡椒不足，味道較淡，如果加多點辣和鹹，相信會好味好多。埋單盛惠$158，兩個人晚飯唔算貴。