1仔冰室

今日去黃埔探朋友, 順道一齊去紅磡嘅呢間1仔冰室食晚飯. 星期日嘅6:15pm, 餐廳已經半滿. 可見呢間新餐廳喺呢一區都已經有一班捧場客. 職員有禮, 亦好主動介紹當日嘅是日晚餐. 加分!!!

我哋三人叫咗三個小菜跟白飯及餐飲. 韮王叉燒炒蛋非常出色. 炒蛋嘅生熟程度控制得剛剛好. 順滑得嚟又唔會太油. Perfect! 啫啫馬拉盞通菜煲雖然略有些少普通,  不過勝在夠大碟, 足夠我哋三人分享! 最後就係桂花蜜雞中翼. 雞翼夠大隻. 炸到脆一脆非常香口惹味. 再配上一層清甜嘅桂花蜜, 正到下次一定要encore! ! ! 

三個人食咗二佰幾蚊. 雖然唔係特別平, 不過有咁嘅食物水準份量嘅一個新裝修冰室, 絕對係物超所值! ! ! 

啫啫馬拉盞通菜煲

桂花蜜雞中翼

韮王叉燒炒蛋